{"id":603,"date":"2020-04-30T01:34:10","date_gmt":"2020-04-30T00:34:10","guid":{"rendered":"https:\/\/undod.cymru\/?p=603"},"modified":"2020-04-30T10:47:28","modified_gmt":"2020-04-30T09:47:28","slug":"gordon-brown","status":"publish","type":"post","link":"https:\/\/undod.cymru\/cy\/2020\/04\/30\/gordon-brown\/","title":{"rendered":"Gordon yr Injan Fawr: penodiad gwleidyddol"},"content":{"rendered":"

Mae Undod wedi beirniadu Llywodraeth Cymru mewn cyfres o flogiau am y ffordd mae wedi ymwneud \u00e2\u2019r argyfwng Covid-19 o\u2019r cychwyn cyntaf, pan fethwyd a gohirio g\u00eam rygbi rhwng Cymru a\u2019r Alban tan y funud olaf \u2013 pan oedd hi\u2019n rhy hwyr i atal miloedd o gefnogwyr rhag teithio i Gaerdydd. Darllenwch y gyfres gyfan.<\/a><\/p>\n

Mae\u2019r diffyg arweiniad cadarn, y diffygion mewn cyfarpar diogelwch, y problemau efo profion, yr amharch a gaiff Cymru gan Lywodraeth Llundain i gyd yn arwyddion o fethiant esblygiad yn ein sefydliad pwysicaf ers ei sefydlu yn dilyn yr etholiadau cyntaf i\u2019r Cynulliad \u2013 fel yr enwyd y babi newydd i gychwyn – ar 6ed o Fai 1999. Dyma\u2019r sefydliad y dylem i gyd fedru ei gefnogi heb feddwl ddwywaith.<\/p>\n

Ond nid fel yna mae hi. Llywodraeth ddi-hyder sydd gennym. Llywodraeth sydd, yn y b\u00f4n, am aros yn rhan o\u2019r Deyrnas Gyfunol. Llywodraeth sydd heb ffydd ynddi hi ei hun, nac ychwaith yng ngallu pobl Cymru i fod yn ddigon doeth ac aeddfed i redeg eu gwlad eu hunain. Llywodraeth sydd, ar waethaf dechreuadau brawdgarol a sosialaidd y Blaid Lafur, wedi dewis efelychu efengyl neo-ryddfrydol y Tor\u00efaid a Llafur Newydd.<\/p>\n

Dyna pam mai llwybr di-ddychymyg mae nhw wedi ei ddilyn o\u2019r dechrau. Ac wrth gwrs hynny ydi\u2019r meddylfryd sy y tu cefn i\u2019r cyhoeddiad fod Llywodraeth Cymru wedi galw ar Gordon Brown a dau arall o aelodau blaenllaw y sefydliad Prydeinig i roi cymorth, i arwain y drefedigaeth fach ofnus lle \u2018rydym yn byw allan o hirlwm Covid-19, ac yn \u00f4l i borfeydd gwelltog.<\/p>\n

Edrych i\u2019r tu allan am waredigaeth. Ymateb rheolwyr, nid ymateb arweinwyr.<\/p>\n

Ond pam Gordon, o bawb? Ac i ba borfeydd?<\/p>\n

Gordon \u2013 am ei fod yn ffigwr o bwys, yn ddi-ddadl. Ond penodiad gwleidyddol yw hwn. Mae o\u2019n ymgnawdoliad o Lafur yn ei Phrydeindod creiddiol, ac o\u2019i thrawsnewidiad i fod yn blaid sy\u2019n cynnal y drefn yn lle ei diwygio. Cofiwn saga y banciau \u2013 y bobl gyffredin fu, a sydd, yn talu am eu hafradlonedd nhw dan oruchwyliaeth Gordon. Cofiwn ymyriad tyngedfennol Gordon yn Refferendwm Annibyniaeth yr Alban, pan gyflwynodd \u201cY Llw\u201d oedd yn addo pethau i\u2019r Alban am wrthod torri\u2019n rhydd \u2013 addewidion nas cyflawnwyd. Cofiwn mai Gordon roddodd i ni yr erchyllbeth a elwir yn \u201cDdiwrnod y Lluoedd Arfog\u201d \u2013 a ddaeth i Landudno yn 2018 ar wahoddiad Cyngor Sir Conwy \u2013 sy\u2019n jambori jingoistaidd yn dathlu militariaeth ac imperialaeth wedi ei lapio ym mhlygion gwaedlyd Jac yr Undeb. Afraid dweud fod Gordon wedi cefnogi Blair ar Ryfel Irac.<\/p>\n

Mae\u2019r diffyg croeso i Gordon gan Blaid Cymru a\u2019r Tor\u00efaid wedi llwyddo yn y gamp anarferol o gael cytundeb rhwng y ddwy blaid! Er am resymau gwahanol, mae\u2019n wir.<\/p>\n

Ac i ba borfeydd gwelltog y cawn ein harwain tybed? Yn ddi-os, y blaenoriaeth fydd ar fynd yn \u00f4l cyn gynted a phosib i\u2019r model cyfalafol sy\u2019 wedi chwalu cymaint ar ein cymunedau a\u2019n gwlad. Mae\u2019r ffaith fod dau arall o Gr\u0175p Gordon yn aelodau o\u2019r Pwyllgor ar Newid Hinsawdd yn galonogol, ond eto i gyd mae nhw\u2019n gweithio i sefydliadau sy\u2019n meddwl yn nhermau modelau economaidd treuliedig. Mae Rebecca Heaton yn gweithio i Drax, yn dilyn cyfnodau efo Shell a BP ac yn arbenigo ar bio-mas (cwmni cynhyrchu trydan ydy Drax sy efo pwerdy anferth sy wedi newid o losgi glo i bio-mas). Mae Paul Johnson yn gweithio i\u2019r Institute of Fiscal Studies \u2013 ond rhwng 2007 a 2010 roedd yn ddirprwy bennaeth Gwasanaeth Economaidd y Llywodraeth, pan oedd Gordon yn Ganghellor y Trysorlys \u2013 ai cyd-ddigwyddiad yw ei apwyntiad tybed? Canfyddiad, hyd yn oed os yn anghywir, o ddrysau\u2019n troi. Ond mewn gwirionedd nid collfarnu\u2019r ddau unigolyn yw\u2019r bwriad yma \u2013 ond gofyn pa broses feddyliol a ddilynwyd i\u2019w dewis.<\/p>\n

Rhaid gofyn y cwestiynau amlwg am natur y Gr\u0175p yma, o\u2019r hyn a ddatgelwyd hyd yn hyn. Byddai\u2019n ymarferiad gwerth chweil i gefnogwyr Undod feddwl am bobl fyddai\u2019n gymwys i\u2019r gwaith!<\/p>\n

Pam na fedr Llywodraeth Cymru gael hyd i bobl sy\u2019n byw yma, yn \u2018nabod y wlad a\u2019i phobl a\u2019i phroblemau unigryw a dyrys, ond hefyd yn gwybod am ei photensial?<\/p>\n

Pam nad oes yna unrhyw s\u00f4n am unigolion sy\u2019n cynrychioli mudiadau cymunedol?<\/p>\n

Pam nad oes yna economegwyr yng Nghymru sy\u2019n ddigon cymeradwy?<\/p>\n

Pam nad oes yna rhywun i gynrychioli\u2019r bregus, y lleiafrifoedd a merched?<\/p>\n

Pam na chymerwyd y cyfle i gydnabod fod yr hen ffyrdd wedi methu, a fod yn rhaid chwilio am ffyrdd newydd o drefnu ein bywydau?<\/p>\n

Mae\u2019r atebion i gyd yn deillio o feddylfryd Llywodraeth Cymru. Dyna yw dagrau pethau \u2013 fod ein prif sefydliad gwleidyddol yng Nghymru yn meddwl yn nhermau\u2019r Deyrnas Gyfunol gyfalafol dro ar \u00f4l tro ar \u00f4l tro. A heb dderbyn nad ydi\u2019r Deyrnas Gyfunol ddim yn malio\u2019r un botwm corn am Gymru.<\/p>\n

Ddydd Mercher dywedodd Jeremy Miles yng nghynhadledd y wasg y gallai\u2019r pandemig coronafeirws gael effaith dyfnach ar Gymru oherwydd y boblogaeth yn h\u0177n a\u2019r proffil economaidd. \u2018Does dim s\u00f4n yn yr adroddiad o\u2019r gynhadledd fod Mr Miles wedi rhoi rhesymau pam fod Cymru mewn sefyllfa mor wael ar \u00f4l 20 mlynedd o Lywodraeth un blaid…<\/p>\n

Ychwanegodd na fedrwn ni ddim mynd yn \u00f4l i \u201cfusnes fel arfer\u201d a fod yn rhaid cynllunio Cymru ar gyfer y dyfodol gan gael ein llywio gan \u201cgyfiawnder cymdeithasol, economaidd ac amgylcheddol\u201d. Dyna, byddem yn meddwl, oedd bwriad \u201cDeddf Llesiant Cenedlaethau\u2019r Dyfodol (Cymru) 2015\u201d, ond dangosodd y cyfnod yn dilyn pasio\u2019r ddeddf mor ddi-rym a di-ddannedd a fu hyd yma.<\/p>\n

Anffodus felly fod penodiad Gordon \u2013 a gyhoeddwyd gan Mr Miles – yn tanseilio\u2019r rhethreg aruchel yma. Gordon Brown YW<\/em> Mr Busnes Fel Arfer!<\/p>\n

Cwestiwn hollol rethregol i gloi. A fyddai Albanwr arall a alwyd gan yr hanesydd Kenneth O Morgan yn \u201carloeswr mwyaf ac arwr mwyaf Llafur\u201d wedi adnabod y blaid sy wedi rhedeg Llywodraeth Cymru o\u2019r dechrau un fel y Blaid Lafur y bu ganddo ran mor enfawr yn ei sefydlu?<\/p>\n

Go brin, Keir Hardie, go brin.<\/p>\n

Nodiadau<\/h2>\n