Undod: dewch i lansiad y mudiad dros Annibyniaeth Radical i Gymru

Mae hi’n bleser cael eich gwahodd i lansiad mudiad blaengar newydd dros annibyniaeth i Gymru.

Siaradwyr:

• Nia Edwards-Behi
• Sandy Clubb
• Dan Evans (Desolation Radio)
• + mwy

Dydd Sadwrn 26th mis Ionawr 2019
11yb tan 3yp
Yr Hen Goleg, Aberystwyth, SY23 2AU

Digwyddiad lansiad Undod ar Facebook

---

Am 11yb, ar 26ain mis Ionawr 2019, cynhelir cyfarfod cyhoeddus yn Yr Hen Goleg, Aberystwyth, gan fudiad newydd sy’n arddel annibyniaeth radical i Gymru. Mae’r grŵp yn cyfarfod dan yr enw Undod ac yn barod i lenwi bwlch hanfodol o fewn y mudiad annibyniaeth, mewn gwlad sydd â threftadaeth sosialaidd amlwg ac sydd – yn fwy dim – angen newid radical yn ei gwleidyddiaeth.

Bydd y grŵp yn pwysleisio’r angen i annibyniaeth ymgorffori gwerthoedd a pholisïau a fydd yn gwneud gwahaniaeth sylweddol i ansawdd bywyd y mwyafrif o bobl. Mae’n bwriadu ymgyrchu ar y materion allweddol sy’n achosi dioddefaint ac anghyfiawnder yn y Cymru sydd ohoni, gan geisio gwireddu newid yn y presennol; fodd bynnag, bydd yn gweithredu ar sail y ddealltwriaeth mai rhyddid o’r wladwriaeth Brydeinig adweithiol yw’r unig beth all wir sicrhau ffyniant parhaol i gymunedau Cymru.

Darllenwch egwyddorion Undod.

Y gobaith yw y bydd y grŵp yn derbyn cefnogaeth o bob rhan o Gymru a’i phobl amrywiol, ac y bydd – yn ogystal â chyfrannu at wleidyddiaeth ymarferol – yn denu cyfraniadau gan wneuthurwyr polisi, academyddion ac eraill sy’n dymuno helpu i dychmygu a gwireddu Cymru annibynnol wir flaengar.

Yn ogystal â chefnogi undod rhyngwladol, bydd ffocws ar feithrin cydsafiad rhwng cymunedau yng Nghymru. Rhagdybiaeth sylfaenol yw’r ffaith – er gwaethaf y symptomau gwahanol – bod cymunedau amrywiol Cymru yn wynebu heriau mawrion oherwydd cyfalafiaeth ddilyffethair.

Golyga hyn bod ein cymunedau ôl-ddiwydiannol yn fregus ac yn llwyr ddibynnol ar gyfalaf tramor, tra bod ein cymunedau gwledig yn gweld eu pobl ifanc yn ymadael, argyfwng tai a thranc y Gymraeg, wedi’i ysgogi gan bolisïau rhanbarthol gwan gan Lywodraeth Cymru a grym prynwriol llethol o’r tu allan.

O dan yr amgylchiadau hyn, a chyda’r bygythiad cynyddol o’r adain dde eithafol yng Nghymru a thu hwnt, ni all y rhai sydd yn credu mewn cydraddoldeb, cyfiawnder a dyfodol cynaliadwy sefyll i’r neilltu.

Ni allwn gadael ein pobl yn ysglyfaeth i’r wladwriaeth Brydeinig lygredig, na chwaith caniatáu i siofinyddiaeth wleidyddol elitaidd wreiddio yma. Ymhellach, mae datganoli wedi dangos ei bod yn analluog i’n hamddiffyn rhag gormodedd y Torïaid.

Mae’n hen bryd i ni, pobl Cymru, uno, er mwyn gwireddu’r i ni’n hunain yr egwyddorion hynny rydym yn hanesyddol wedi sefyll drosto yn y byd: cydraddoldeb, cyfiawnder a heddwch.

Felly dewch gyda ni, i gydsefyll – mewn Undod.