Ymunwch ag Undod heddiw

I ni, bobl Cymru, roedd nos Iau yn gadarnhad i nifer cynyddol ohonom nad oes dyfodol i ni a’n plant o fewn strwythurau’r wladwriaeth Brydeinig. Gallasai cynghreirio rhwng ein pleidiau ‘blaengar’ wedi achub y dydd o safbwynt cadw y Toriaid mas o’n etholaethau seneddol, ond gweithred dros dro byddai hynny wedi bod, y byddai wedi celu’r hyn sydd yn digwydd ledled Ynys Prydain, sef ymddieithrio pellach o’n dosbarth gwleidyddol, anobaith, a rhwystredigaeth yn wyneb degawdau lawer o ddioddef.

Mae’n rhaid i ni weithredu er mwyn rhyddhau ein hunain. Gyda ni, y bobl, y mae’r grym. Y mae mudiadau blaengar hanesyddol, a mudiadau llwyddiannus cenedlaetholgar, wastad wedi codi o’r bobl, a rhaid i ni bob tro atgoffa ein hunain o hynny, mewn byd lle mae’n teimlo’n gynyddol anodd i ddylanwadu ar yr hyn sydd o’n cwmpas. A mae gobaith yn parhau i ni yng Nghymru, am y tro. Yn ein calonnau, yn ein hetifeddiaeth, yn ein profiad cyfunol o frwydrau dros ein hawliau, ein hiaith a’n bodolaeth, mae gennym yr ewyllys a’r gallu i frwydro yn ol. Merthyr, y Siartwyr, Ysbryd Beca, pentrefi chwarel y gogledd, y maes glo yn y De; rhaid i ni ailafael yn ysbryd brwydrau’r gorffennol er mwyn diogeli heddiw ein gweithwyr, ein lleiafrifoedd a difreintiedig, a’n hamgylchfyd – a chreu dyfodol o’r newydd.

Roedd dedfryd yr etholiad ar y Deyrnas Gyfunol yn derfynol. Rhaid i ni beidio a gochel rhag gwirioneddau’r canlyniad. Yn wyneb casineb, celwydd, dirmyg, eithafiaeth, hiliaeth, llymder, propaganda, a’r addewid o rwygo’n yfflon yr hyn sydd ar ol o’r wladwriaeth les, fe bleidleisiodd Prydain dros Boris Johnson a’r Blaid Doriaidd mwyaf asgell dde ac adweithiol yr oes fodern. Ymhellach, fe aeth bron i 40% o’r bledlais yng Nghymru i’r un blaid – yn symbol o fethdaliad moesol ein gwleidyddiaeth ni oedd y 27,000 pleidlais ym Mro Morgannwg dros Alun Cairns, gwas bach Boris Johnson, dan ymchwiliad plaid ei hun am gefnogi dyn a ddrylliodd achos llys o draes rhywiol.

A’r gwrthblaid wedyn yn rhanedig, yn cloffi o dan arweiniad gwleidydd y chwith sydd wedi cael ei danseilio’n llwyr. Fe welwn bron yn ddyddiol ymdrech gwleidyddion prif ffrwd Llafur i danseilio rhaglen sosialaidd go iawn y blaid honno, gan amlygu ei natur ragweithiol. Deilliai eu trafferthion hefyd o’r wasg elitaidd Brydeinig, sydd yn cynrychioli’r buddiannau’r dosbarth hynny all sicrhau na fydd y Deyrnas Gyfunol byth yn wladwriaeth gyfiawn sydd yn edrych ar ôl buddiannau’r gweithwyr, lleiafrifoedd a’r difreintiedig. Gan gydnabod gwendidau Corbyn fel arweinydd, rhaid cydnabod y strwythurau dyfnion yma bydd pob tro yn llethu newid er y gwell yn y Deyrnas Gyfunol. Yn wir, y strwythur fwyaf gaethiwus ohonynt i gyd yw traddodiad unoliaethol llafur, nad sydd yn caniatau cydraddoldeb i Gymru – ac fel mae datganoli yn profi, yn sicrhau statws eilaidd ni waeth be fo’r setliad cyfansoddiadol. Cadarnhad yw’r etholiad hwn mai ffug yw unrhyw obaith o achubiaeth i gymunedau Cymraeg, trwy law y wladwriaeth a’r Blaid Lafur Brydeinig.

Y mae Plaid Cymru yn parhau i ymdrechu’n gryf yn ei ardaloedd traddodiadol a ledled y wlad. Mae’n rhan annatod o’r mudiad torfol sydd ei angen i greu newid go iawn, ond peryg yw gorddibyniaeth ar un blaid, yn enwedig lle mae ennill tir o’r newydd wedi profi’n anodd. Yn wyneb yr her yma, ac ar sail y gobaith o’r newydd y mae’r mudiad cenedlaethol yn cynnig, rydym yn annog chi ymuno gydag Undod, i newid Cymru er y gwell.

Clodforwn YesCymru ac AUOBCymru am eu gwaith caled yn arwain y ffordd at annibyniaeth.

Gwaith Undod yw sicrhau bod gan y mudiad hwnnw weledigaeth o Gymru sydd yn wrthbwynt i’r gwleidyddiaeth wenwynig, gormesol, ymerodraethol y sefydliad Prydeinig, sydd yn cynnig gobaith ac uchelgais – ac ein bod ni’n dechrau gweithredu ar y weledigaeth honno nawr. Rhaid i ni uno grymoedd blaengar Cymru, rhaid i ni sefyll yn gadarn a datgan yn glir o blaid cymdeithas amgen, a chreu realiti newydd sydd yn ymateb i heriau bywyd beunyddiol pobl, ac yn cynnig rhyddfreiniad o fileindra’r gymdeithas gyfoes.

Nid oes amser i’w colli, ymunwch heddiw.